ڈیبٹ کارڈ

بعض اوقات بینک ڈیبٹ کارڈ استعمال کرنے پر ڈسکاؤنٹ دیتا ہے، جیسے ریسٹورنٹ یا خریداری پر 20% 30%ڈسکاونٹ ، کیا اس ڈسکاونٹ کو استعمال کرنا جائز ہے؟

 نوٹ: میرے پاس دو اکاؤنٹس ہیں ایک میزان بینک میں اور دوسرا حبیب میٹرو بینک میں ،کسی بھی اکاؤنٹ میں کوئی سودی لین دین نہیں ہے۔

اَلجَوَابْ بِاسْمِ مُلْہِمِ الصَّوَابْ

غیر سودی بینک جو مستند علماء اور مفتیانِ کرام کے زیر نگرانی کام کرتے ہیں ان کے ڈیبٹ کارڈ پر ملنے والے ڈسکاؤنٹ کا استعمال تو حلال ہے،چاہے ڈسکاؤنٹ بینک کی جانب سے ہو یا اس ادارے کی جانب سے جس سے خریداری کا معاملہ کیا جارہا ہے،سیونگ اکاؤنٹ ہونے کی صورت میں تو اس لئے کہ اس میں بینک اور صارف کے تعلق کا مدار مضاربت،شرکت یا وکالت بالاستثمار پر ہوتا ہے،قرض پر نہیں،لہذا اسے قرض پر نفع نہیں قرار دیا جاسکتا،جبکہ کرنٹ اکاؤنٹ کی صورت میں اگرچہ بینک اور صارف کا تعلق قرض کی بنیاد پر ہوتا،لیکن درج ذیل وجوہ سے پھر بھی اس کی گنجائش معلوم ہوتی ہے:

1۔یہ ڈسکاؤنٹ مشروط نہیں ہوتا،یعنی اکاؤنٹ کھلواتے وقت اس قسم کی آفر دینے کی کوئی شرط نہیں ذکر کی جاتی،بلکہ بینک ایسی آفر دینے میں بااختیار ہوتا ہے۔

2۔ یہ ڈسکاؤنٹ تمام ڈیبٹ کارڈ ہولڈر صارفین کے لئے ہوتا ہے،چاہے ان کا کرنٹ اکاؤنٹ ہو یا سیونگ،جس سے معلوم ہوتا ہے کہ یہ سہولت قرض کی بنیاد پر نہیں،بلکہ بینک کا کسٹمر ہونے کی بنیاد پر دی جاتی ہے۔

جبکہ سودی بینکوں کے ڈیبٹ کارڈ (Debit Card)کے استعمال پر ملنے والے ڈسکاؤنٹ کے جائز اور ناجائز ہونےکی تفصیل درج ذیل ہے :

1۔ اگر ڈسکاؤنٹ  مکمل طور پر بینک کی طرف سے ہو، تو اس صورت میں اس رعایت کا حاصل کرنا شرعاً ناجائز ہوگا، کیوں کہ یہ رعایت بینک کی طرف سے کارڈ ہولڈر کو اپنے بینک اکاؤنٹ کی وجہ سے مل رہی ہے، جو شرعاً قرض کے حکم میں ہے اور جو فائدہ قرض کی وجہ سے حاصل ہوتا ہے، وہ سود کے زمرے میں آتا ہے۔

2۔ اگر اس ادارے کی جانب سے ہو، جہاں سے کچھ خریدا گیا ہے یا وہاں کھانا کھایا گیا ہے، تو یہ اس ادارے کی طرف سے تبرع و احسان ہونے کی وجہ سے جائز ہوگا۔

3۔ اگر ڈسکاؤنٹ مشترکہ طور پر دونوں کی طرف سے ہو، تو بینک کی طرف سے دی جانے والی رعایت کا حصول جائز نہیں ہوگا۔

واضح رہے کہ میزان بینک غیر سودی ہے،جبکہ حبیب میٹرو سودی بینک ہے۔

حوالہ جات

“بدائع الصنائع ” (7/ 395):

“(وأما) الذي يرجع إلى نفس القرض: فهو أن لا يكون فيه جر منفعة، فإن كان لم يجز، نحو ما إذا أقرضه دراهم غلة، على أن يرد عليه صحاحا، أو أقرضه وشرط شرطا له فيه منفعة؛ لما روي عن رسول الله – صلى الله عليه وسلم – أنه «نهى عن قرض جر نفعا» ؛ ولأن الزيادة المشروطة تشبه الربا؛ لأنها فضل لا يقابله عوض، والتحرز عن حقيقة الربا، وعن شبهة الربا واجب “.

محمد طارق

دارالافتاءجامعۃالرشید

02/ذی الحجہ1444ھ

Similar Posts

  • کیا فرماتے ہیں مفتیانِ کرام اس مسئلہ  کے بارے میں کہ عورتوں  کا قبرستان جانا شرعا کیسا ہے؟ اَلجَوَابْ بِاسْمِ مُلْہِمِ الصَّوَابْ عورتوں کے لیے قبرستان جانے کی فی نفسہ تو اجازت ہے، لیکن چونکہ عام طور پر عورتیں بے پردگی کی حالت میں قبرستان جاکر جزع و فزع کرتی ہیں ،جبکہ وہاں جاکر بدعات…

  • محرم الحرام کی فضیلت

    ماہِ محرم کی فضیلترسول اللہ صلی الله علیہ وسلم نے ارشاد فرمایا:رمضان کے بعد افضل ترین روزے اللہ تعالیٰ کے مہینے محرم کے ہیں۔( مسلم)اس حدیث میں رسول اللہ صلی الله علیہ وسلم کا محرم الحرام کی نسبت اللہ تعالیٰ کی طرف فرمانا، اس مہینے کے شرف اور خصوصی فضیلت پر دالّ ہے، کیوں کہ…

  • عدت کے اندر رجوع

     میری بیوی (……..) گزشتہ تقریباً 14 سال سے میرے نکاح میں ہے اور ہمارے چار بچے ہیں (دو بیٹے اور دو بیٹیاں)۔ کچھ عرصہ قبل میں نے دوسری شادی کی، جس کی وجہ سے میری پہلی بیوی ناراض ہو کر گھر چھوڑ کر چلی گئی، جبکہ ایک چھوٹی بیٹی کو میں نے اس کے پاس…

  • ایزی پیسہ اکاؤنٹ کے استعمال کا حکم

    سوال کیا Easy paisa Account کو صرف اپنی ضرورت کے لیے استعمال کرنا جائز ہے؟ مثلاً بجلی وغیرہ کا بل جمع کروانے کے لیے یا کسی کو پیسہ بھیجنے کے لیے۔ اگر کسی بھی سودی اسکیم کو استعمال نہ کیا جائے۔ جواب ’’ایزی پیسہ اکاؤنٹ ‘‘   ایک ایسی سہولت ہے جس میں آپ اپنی جمع…

  • سوال میں ڈیجیٹل مارکیٹنگ کی جاب کرتا ہوں اور فری لانسر ہوں۔ میں ہر وقت رزق میں برکت  کے لیے اور کوئی پریشانی کی حالت ہو یا نہ ہواستغفار پڑھتا رہتا ہوں۔ مجھے ایک دوست نے بتایا کہ یہ آپ صحیح نہیں کر رہے، اس سے نقصان ہوگا۔ اس نے شاذلیہ سلسلے کے بارے میں…

  • رات میں قربانی کرنا: دسویں اور تیرہویں رات کو قربانی کرنا جائز نہیں۔ گیارہویں اور بارہویں رات کو جائز ہے، مگر رات میں رگیں نہ کٹنے، یا ہاتھ کٹنے، یا اضحیہ کے آرام میں خلل کے اندیشہ سے ذبح کرنا مکروہ تنزیہی ہے ۔(حاشية ابن عابدين، 6/32

Leave a Reply

Your email address will not be published. Required fields are marked *